ILEI videblis. aktivis en Münster

La instruista ligo aktive partoprenis en la komuna germana-nederlanda kongreso, okazigita tra la pentekosta semajnfino (junio 11-13) en la apudlima germana urbo Münster. Du estraranoj de la ligo partoprenis, ambaŭ prezentintaj prelegojn dum la programo. La prezidanto de ILEI havis okazon saluti la kongreson, agnoskinte ke la germana sekcio estas la plej granda en la Ligo, kaj krome inter la plej aktivaj.

Tiu sekcio, AGEI, okazigis sian jarkunsidon dum la kongreso. Gravaĵo el tiu kunsido estis la decido, ke la sekcio proponu al ILEI organizi en Germanio la ILEI-konferencon en 2013. Oni konstatis, ke kvankam la germana sekcio havas longan historion, kaj ludis esencan rolon tra multaj fruaj jaroj, neniam ĝi gastigis konferencon.

Estraranino Zsofia Korody elpashis plurfoje en la kongreso, interalie pri la novaĵoj en la Esperanto-urbo, en kiuj la instruado kaj klerigo ludas centran rolon.

La projekto ‘esperanto125’ estis prezentita de la ILEI-prezidanto; la Ligo antaŭenpuŝas la ideon, cele al trovo de partneroj kaj helpantoj por inde celebri la 125-jaran jubileon de Esperanto en la jaro 2012. Kunsido de la federaci-landaj ligoj de GEA konsentis loki la jubilean festadon centre en siaj laborplanoj por 2012. ILEI restas en kontakto kun la estraroj de GEA kaj NEA pri plia evoluigo de la planoj por ‘125’.

Plia novaĵo en la kongreso estis la aperigo de la germana versio de la alloga varbilo ‘Malkovru Esperanton’, eldonita kune de E@I kaj ILEI. La ligo, kune kun partnero ICH (Herzberg) prizorgis standon en la tutkongresa Movada Foiro, dum la nova prospekto de ILEI, kune kun mendiloj, estis dismetitaj tra la tuta kongresejo. Resume, ILEI videblis kaj aktivis.

Stefan MacGill, Münster, 13 junio, 2011.

**********************************************


Esperanto-kursoj, ekzamenoj, biblioteko

Interkultura Centro Herzberg

DE-37412 Herzberg am Harz, la Esperanto-urbo

Grubenhagenstr. 6

Tel: 0049-(0)5521-5983

http://esperanto-urbo.de